بسم الله الرحمن الرحيم
الاضراب نجح
انا مش هتكلم على المحلة والى حصل فيها لانه شىء بجد فوق الخيال
والناس الى اتقبض عليهم والاطفال
ومش هتكلم على عدد المعتقالين
ومش هتكلم على اسراء البنت الى ربنا يكرمها الى عمله جروب بتاع الاضراب الى العدد وصل فيه الى 65 الف
وتم القاء القبض عليها واعتقالها
انا هتكلم عن جامعة القاهرة
انا يوم السبت نزلت الجامعة وقابلت ناس من حركة حقى
وكنت معاهم وهما بيعرفوا الطلبة بالاضراب وبيوزعوا ورق على الطلبة
النهاردة يوم الاحد 6 ابريل اتفقنا اننا ننزل الجامعة ونعمل مظاهرة
طبعا الاخوان اكبر عدد فى الجامعة يعنى طلاب الاخوان ممكن يكون عددهم 10000 طالب
وطبعا الاخوان قرروا انهم مش هيشاركوا فى الاضراب
المهم رحت الجامعة وكان معايا واحد صاحبى
وكانت الجامعة لاول مرة العدد فيها قليل جدا
المهم اتصلت ببعض الطلبة ولقيت عددهم 15 طالب من الاشتراكيون والغد والجبهه وحركة حقى
ولاول مرة وجود امن بهذا الشكل المكثف جدا
كل خطوة فى واحد من بتوع الامن
واتجهنا الى ساحة اداب وهناك زاد العدد
وبدانا اية الى حصل
طلاب اتحاد الطلبة قاموا جايين واحنا واقفين وقعدوا يلعبوا كرة قدم
وتنس طاولة وعملوا مسابقة ثقافية الى يفوز ياخد ملابس هدية
ودخلوا طلبة معانا علشان يعملوا مشاكل وضربوا بعض الناس مننا
والامن طبعا محاصر المكان وبيحاول يمنع اى طالب انه ينضم لينا
المهم بدانا فى اداب وبعدكدة حقوق وبعد كدة تجارة وبعد كدة حقوق ثانى
وبق العدد يزيد عن 3 الاف طالب وطالبة وطبعا فى عدد كبير اوى من الطلبة تم منعهم من الدخول الى المظاهرة
وبدأ الطلبة يهتفوا ضد النظام وضد الحكومة
وقام رئيس الجامعة بمشاهدة ما يحدث من خلف زجاج مكتبه مما ادى الطلاب الى الهتاف انزل انزل
ولكنه رفض وقام الطلاب بتحويل مجرى الاحداث من المطالبة بحق الشعب الى المطالبة بحقوق الطلاب
ورفعوا 6 مطالب لرئيس الجامعة
وقد وافق ولكنه وعد بلقاء موسع غدا مع الطلبة
وهذا كان على مدار 3 ساعات هى مدة المظاهرة
المنظر بجد كان يفرح بنات بيتكلموا بجد وكان عددهم اكثر من الشباب
بعض الاجانب كانوا بيصورا المظاهرة
هحاول اجيب الصور علشان تعرفوا ان مصر لسه فيها ناس بجد
المهم ان دى البداية وهيكون فى اضراب ثانى فى شهر مايو
ان لم يمتد هذا الاضراب
ادعوا الى اسراء وكل المعتقالين
ودي صور لجامعه القاهرة
الإثنين مايو 05, 2008 5:56 am
