الليلة حاس بضيق عجيب... خشيت المنتدى ولفيت.. شاركت كم من مشاركة وضحكت على
كم من تعليق... قلت يمكن الزهجة والضيقة فكت... لكن بعد ما سكنت الحركة في المنتدى زاد زيادة...
يارب كنت بضحك على نفسي قبيل لما شاركت وافتكرت الزهجة فكت؟... عاينت لمشاركات الفاتت
يمكن استرجع شوية بسطة حتى لو مزيفة.. الضيق زاد اكتر واكتر... فجأة جاني الاحساس انو جميع
مشاركات بدون فايدة وما كانت الا لتقضية وقت ليس الا.... عملت مسكول لجمال عشان يخش بهناك
يمكن الزهجة تروح وتفك.. لقيتها زي ماكان ويمكن اكتر... يملكني احساس كبير بالضآلة.. احساس
صعب لما تقول عن نفسك يالله معقول تفكيرك ضحل للدرجة دي !.... معقول وصلت بي الدرجة انو ارد
رد زي دا؟! واشارك في البوست الفلاني بدل البوست العلاني؟!.... وصل الضيق لمرحلة الاختناق وبقي
يجيني هواجس... ياوليد بالله المقعدك شنو وليه؟... انسحب بدل ما تشوف حوالينك ناس عاقلة
وراكزة قيمتهم ذهب وتختفي انت باثر مؤلم و غير رجعي بسبب مشاركاتك الزي السجم ده... انسحب
هسي يمكن تقدر تنقذ باقي كرامتك وذكرى طيبة تخليها عالقة بالاذهان بدل ما تنهدم كلها في ضحكة
او تعليق في غير موضعا...
يارب بجيكم احساس زي دا ولا انا براي؟
همسة
لا اتكلم عن شيء معين... انما عتاب وحسرة على زيادة الاقتباس واختفاء حلاوة النقاش
الإثنين مايو 05, 2008 5:48 am
